दिव्य प्रदोषस्तोत्रम

श्री गणेशाय नमः ।

जय देव जगन्नाथ जय शंकर शाश्वत ।

जय सर्वसुराध्यक्ष जय सर्वसुरार्चित ।। 1 ।।

जय सर्वगुणातीत जय सर्ववरप्रद ।

जय नित्य निराधार जय विश्वम्भराव्यय ।। 2 ।।

जय विश्वैकवन्द्येश जय नागेन्द्रभूषण ।

जय गौरीपते शम्भो जय चन्द्रार्धशेखर ।। 3 ।।

जय कोट्यर्कसङ्काश जयानन्तगुणाश्रय ।

जय भद्र विरूपाक्ष जयाचिन्त्य निरञ्जन ।। 4 ।।

जय नाथ कृपासिन्धो जय भक्तार्तिभञ्जन ।

जय दुस्तरसंसारसागरोत्तारण प्रभो ।। 5 ।।

प्रसीद मे महादेव संसारार्तस्य खिद्यतः ।

सर्वपापक्षयं कृत्वा रक्ष मां परमेश्वर ।। 6 ।।

महादारिद्र्यमग्नस्य महापापहतस्य च ।

महाशोकनिविष्टस्य महारोगातुरस्य च ।। 7 ।।

ऋणभार परीतस्य दह्यमानस्य कर्मभिः ।

ग्रहैः प्रपीड्यमानस्य प्रसीद मम शंकर ।। 8 ।।

दरिद्रः प्रार्थयेद्देवं प्रदोषे गिरीजापतिम ।

अर्थाढ्यो वाऽथ राजा वा प्रार्थयेद्देवमीश्वर ।। 9 ।।

दीर्घमायुः सदारोग्यं कोषबृद्धिर्वलोन्नतिः ।

ममास्तु नित्यमानन्दः प्रसादात्तव शङ्कर ।। 10 ।।

शत्रवःसंक्षयं यान्तु प्रसीदन्तु मम प्रजाः ।

नश्यन्तु दस्यवो राष्ट्रे जनाः सन्तु निरापदः ।। 11 ।।

दुर्भिक्षमरिसन्तापाः शमं यान्तु महीतलेः ।

सर्वसस्यसमृद्धिश्च भुयात्सुखमया दिशः ।।12 ।।

एवमाराधयेद्देवं पूजान्ते गिरीजापतिम् ।

ब्राह्मणान्भोजयेत् पश्चाद्दक्षिणाभिश्च पूजयेत् ।। 13 ।।

सर्वपापक्षयकरी सर्वरोगनिवारणी ।

शिवपूजा मयाऽऽख्याता सर्वाभीष्टफलप्रदा ।। 14 ।।

।। इति दिव्य प्रदोषस्तोत्रम सम्पूर्णम् ।।

*

श्री नारायण हरिः ।।